Ferill 480. máls. Aðrar útgáfur af skjalinu: Word Perfect.
1993–94. – 1063 ár frá stofnun Alþingis.
117. löggjafarþing. – 480 . mál.
1022. Svar
utanríkisráðherra við fyrirspurn Svavars Gestssonar um athugasemdir Ríkisendurskoðunar og yfirskoðunarmanna ríkisreiknings.
Fyrirspurnin hljóðar svo:
Hvað hefur ráðherra gert til að fylgja eftir athugasemdum Ríkisendurskoðunar og yfirskoðunarmanna ríkisreiknings fyrir árið 1992?
Eins og fram kemur í athugasemdum Ríkisendurskoðunar gerði utanríkisráðuneytið í ársbyrjun 1992 ráðstafanir til að bæta eftirlit með yfirfærslu fjármuna þannig að ekki verði greitt meira til sendiráða og fastanefnda en nemur eðlilegri fjárþörf þeirra á hverjum tíma.
Utanríkisráðuneytið mun framvegis taka mið af ábendingum um færslu söluandvirðis vegna eignabreytinga og færa tekjur á ríkissjóðstekjur á því ári sem eignabreytingar verða.
Fríhöfn, Keflavíkurflugvelli.
Gerðar hafa verið ráðstafanir í fullu samræmi við ábendingar í athugasemdum, einkum hefur með tölvuskráningu verið bætt talning á lager og skráning lagerbókhalds.
Flugmálastjórn, Keflavíkurflugvelli.
Endurskoðun og athugun á gjaldskrá flugvallarins hefur farið fram og mun áfram verða til skoðunar í tengslum við hugmyndir um markaðssetningu flugvallarins, aukna nýtingu hans, fríiðnaðarsvæði o.fl.
Flugstöð Leifs Eiríkssonar.
Unnið er að lausn á fjárhagsvanda flugstöðvarinnar. Í nánu samráði við fjármálaráðuneyti eru nú í undirbúningi tillögur er miða að lausn fjárhagsvandans og vonast er til að niðurstaða þar um verði í maímánuði nk.
