[18:05]
Svavar Gestsson (andsvar) :
Hæstv. forseti. Frammi fyrir þessum rismikla málflutningi stendur maður að sjálfsögðu agndofa. Þetta var svo gríðarlega málefnalegt og rökhelt og í raun og veru stórmerkilegt innlag til skólamálaumræðunnar á Íslandi. Ég verð því miður að hryggja hv. þm. með því að þær þúsundir ungmenna á Íslandi sem ekki finna sig í framhaldsskólakerfinu í dag munu skammt þrífast á þessum útúrsnúningum hennar hér.
