Guðmundur Árni Stefánsson (andsvar):
Virðulegi forseti. Þessi fátæklegu orð hæstv. ráðherra breyta í engu því sem ég sagði áðan. Upphafleg markmið þessa samráðs voru að bæta samskiptareglur á vinnumarkaði. Eru það með öðrum orðum viðhorf hæstv. ráðherra að framganga hans hér, þessar tillögur hans sem birtast okkur í frumvarpsformi með þeim hætti sem hér um ræðir, séu til þess fallnar að bæta þessar samskiptareglur á vinnumarkaði?
Ég ítreka það, virðulegi forseti, að tilgangurinn var sá að koma á samráðsvettvangi þar sem frjálsir aðilar vinnumarkaðarins sætu yfir og færu yfir þá möguleika sem í stöðunni væru til bættra samskipta og að fulltrúi félmrn. væri eins konar verkstjóri þeirra viðræðna en ekki það að hann tíndi í umboði ráðherra út eitt og annað, hugmyndir og viðhorf, eins og hæstv. ráðherra orðaði það og flytti hér í frumvarpsformi gegn háværum mótmælum fjölmargra þeirra sem í nefndinni sátu. Því segi ég enn og aftur: Þetta er að hafa endaskipti á hlutunum, virðulegi forseti.