Bryndís Hlöðversdóttir (andsvar):
Herra forseti. Þetta voru stórmerk orð sem hér voru sögð. Norrænt módel í vinnurétti um samskiptaaðila vinnuréttarins sem er virt um allan heim og er alls staðar litið til á vinnumarkaði heitir hjá hæstv. ríkisstjórn Íslands ,,villta vestrið``. Þetta lýsir að mínu mati því fullkomna skilningsleysi sem ríkisstjórnin hefur sýnt gagnvart samskiptum aðila á vinnumarkaði og gagnvart því hvernig þau samskipti eigi að fara fram. Mér finnst hreinlega ámátlegt að horfa upp á Framsfl. og einkum og sér í lagi hæstv. félmrh. draga þennan vagn frjálshyggjunnar og vinna skítverkin fyrir Sjálfstfl. Ég held það sé kominn tími til að hann fari að hugsa sig um.