Tómas Ingi Olrich (andsvar):
Þetta er einmitt mergurinn málsins, virðulegi forseti, að hv. þm. horfir algerlega fram hjá því hve fjölgað hefur í þessari stétt á undanförnum árum. Þeir menn sem hafa komið nýir inn í bátaflotann eru ekki þessar liðnu kynslóðir af smábátaútgerðarmönnum sem hv. þm. var að verja í ræðu sinni af miklum fjálgleik og hita og miklum þunga. Ég er einmitt að tala um að þessir nýju aðilar í smábátaútgerðinni eru ekki látnir borga þetta. Þeir hirða allan ágóðann af þessum breytingum og það eru aflamarksbátarnir sem borga það.