Guðmundur Árni Stefánsson:
Virðulegi forseti. Skattlagning á vaxtatekjur hefur verið réttlætismál í okkar þjóðmálaumræðu. En umtalsverðar fjármagnstekjur hafa fram að þessu verið skattfrjálsar. Við eðlilegar aðstæður væri hér á ferðinni samkomulagsmál. Hið jákvæða í málinu er að hér er verið að stíga merkilegt skref til upptöku skatts á vaxtatekjur. Meðhöndlun stjórnarflokkanna á málinu og umtalsverð skattalækkun á stóreignamenn sem hafa hagnað af arði, söluhagnaði og leigutekjum hefur hins vegar skekkt málið umtalsvert og getur að sumu leyti aukið mismunun í samfélaginu fjármagnseigendum í hag. Í ljósi þessarar meðferðar málsins er ekki unnt að styðja það. Þess vegna situr undirritaður hjá og Alþfl. sömuleiðis.