Svanfríður Jónasdóttir (andsvar):
Herra forseti. Ég tek eftir því að þegar stjórnarandstaðan lýsir áhyggjum af stöðu kjaramála þá bendir hæstv. utanrrh. á að mál séu nú að leysast vegna þess að gerðir hafi verið sérkjarasamningar við nokkrar loðnuverksmiðjur fyrir austan. Þeir samningar sem þar hafa tekist eru taldir upp á 20--25% launahækkun. Af því að ráðherra vill að við lítum sérstaklega til þeirra vil ég spyrja: Er ríkisstjórnin tilbúin til að gera slíkar hækkanir að sinni stefnu varðandi opinbera starfsmenn í fyrsta lagi og í öðru lagi að hvetja VSÍ til hins sama á almenna markaðnum?