Fjármálaráðherra (Friðrik Sophusson):
Virðulegi forseti. Ef ósk kemur fram um það að halda vaxtabótunum óbreyttum af því að vaxtabótakerfið sé svo gott í núgildandi lögum, þá er sjálfsagt að verða við því.
Varðandi barnabæturnar má ugglaust hugsa sér einhverja aðra útfærslu en ég hef ekki heyrt að nein óánægja hafi komið fram í stórum stíl vegna þess hvernig útfærslan er á barnabótunum. Það er hins vegar umhugsunarvert þegar maður hlustar á ræður hv. alþýðubandalagsmanna í þingsal hvernig þeir taka þessum málum. ASÍ kom á fund ríkisstjórnarinnar og bað ríkisstjórnina um útspil í skattamálum, helst fyrir fram. Ríkisstjórnin hefur nú komið með sitt útspil og þá koma þeir í þingsal, eins og hv. þm. Steingrímur J. Sigfússon, og amast við því að við séum að færa völdin út í bæ með þessum hætti. Með öðrum orðum er það Alþb. sem á þingi er að reyna að koma í veg fyrir að ASÍ geti haft áhrif á það hvernig við ætlum að standa að breytingum á skattalögum til þess að koma skattalækkunum til almennings í landinu. Það er athygli vert.