Umhverfisráðherra (Guðmundur Bjarnason) (andsvar):
Hæstv. forseti. Ég vil bara undirstrika það sem kom fram í ræðu minni áðan og hv. 8. þm. Reykv. ítrekar hér, að aðkoma umhvrn. og umhvrh. að málinu er sú að gefa álit á eða réttara sagt kveða upp úrskurð um kærur um mat á umhverfisáhrifum þessarar verksmiðju á þessum ákveðna stað. Í slíku ferli eru valkostir ekki settir fram þannig að umhvrh. eigi að segja í sínum úrskurði: Er þessi verksmiðja betur komin hér en þar? Er hún betur komin einhvers staðar annars staðar? Ef það hefði verið ákvörðun um staðsetningu á Keilisnesi eða Langanesi, svo við höldum okkur við þau tvö nes sem hér voru áður nefnd í umræðunni, þá hefði matið á umhverfisáhrifunum farið fram á viðkomandi stað á þessari atvinnustarfsemi. Hefði það verið kært, þá hefði það komið í hlut umhvrh. að úrskurða um þá kæru.