Frsm. sjútvn. (Árni R. Árnason):
Herra forseti. Ég mæli fyrir nefndaráliti hv. sjútvn. um till. til þál. um rannsóknir og sjómælingar innan efnahagslögsögunnar.
Nefndin hefur fjallað um málið og fengið á sinn fund Hafstein Hafsteinsson frá Landhelgisgæslunni og Hilmar Helgason frá Sjómælingum Íslands. Að lokinni umfjöllun leggur nefndin til að tillagan verði samþykkt með svofelldri breytingu sem birtist á þskj. 1162:
,,Tillögugreinin orðist svo:
Alþingi ályktar að fela ríkisstjórninni að efla rannsóknir og sjómælingar við landið, með sérstakri áherslu á hafsvæðið innan 200 sjómílna efnahagslögsögunnar fyrir sunnan landgrunn Íslands frá Reykjaneshrygg að Færeyjahrygg.``
Ég hygg, herra forseti, að tillagan og nefndarálit þarfnist ekki frekari skýringar og legg því til að málið verði þannig afgreitt við 2. umr.