Forseti (Ragnar Arnalds):
Borist hafa eftirfarandi bréf:
,,Þar sem Margrét Frímannsdóttir, 5. þm. Suðurl., getur ekki sótt þingfundi á næstunni vegna veikinda leyfi ég mér með vísun til 2. mgr. 53. gr. laga um þingsköp Alþingis að óska þess að 3. varaþingmaður Alþb. og óháðra í Suðurlandskjördæmi, Ingibjörg Sigmundsdóttir garðyrkjubóndi, taki sæti á Alþingi í fjarveru hennar og forföllum 1. og 2. varaþingmanns listans í Suðurlandskjördæmi.
Þetta er yður hér með tilkynnt, herra forseti.
Svavar Gestsson,
formaður þingflokks Alþb. og óháðra.``
,,Ég undirritaður varaþingmaður Alþb. og óháðra í Suðurlandskjördæmi get því miður ekki tekið sæti Margrétar Frímannsdóttur 5. þm. Suðurl. í fjarveru hennar nú. Ástæður þessa eru annir í starfi.
Virðingarfyllst, Ragnar Óskarsson.``
Og hér er þriðja bréfið vegna sama máls:
,,Ég undirritaður lýsi því hér með yfir að vegna anna get ég ekki tekið sæti á Alþingi í fjarveru Margrétar Frímannsdóttur.
Virðingarfyllst, Guðmundur Lárusson.``
Ingibjörg Sigmundsdóttir hefur áður tekið sæti á Alþingi og er boðin velkomin til starfa á ný.