Guðný Guðbjörnsdóttir:
Virðulegi forseti. Það kom fram í svari hæstv. ráðherra að nefnd um mótun menntastefnu hafi eitthvað hagnýtt sér niðurstöður Allyson Macdonald en það er alveg ljóst að enn sést ekki að neitt átak hafi verið gert í náttúrufræðikennslu í skólum og síðan eru þó þrjú ár. Þetta sýnir áhugaleysi og máttleysi stjórnar Sjálfstfl. í menntamálum sem setið hefur í ráðuneytinu frá 1991.
Svíar fengu svipaða niðurstöðu fyrir nokkrum árum og þá gerðu þeir strax átak í kennslu raungreina í kjölfarið með þeim afleiðingum að nú koma þeir mun betur út úr TIMSS-rannsókninni en þeir höfðu gert áður. Af þessu tilefni vil ég spyrja hæstv. menntmrh.:
Hvernig hyggst ráðherra bregðast við niðurstöðum TIMSS-rannsóknarinnar nú? Á eingöngu að endurskoða námskrána eða á að leggja frekara átak í raungreinakennslu strax eða á að bíða eftir að niðurstöðurnar verði greindar nánar?
Þá vil ég einnig í þessu sambandi spyrja hann hvort hann hyggst lengja kennaramenntunina í fjögur ár með tilliti til þess samanburðar sem kemur fram á menntun kennara í TIMSS-rannsókninni og þá hvenær.