[prenta uppsett í dálka] 55. fundur
Kristinn H. Gunnarsson:
Herra forseti. Ég styð þessa tillögu og tel eðlilegt að ríkissjóður hlaupi undir bagga með Íþróttasambandi Íslands þegar svo stendur á sem raun ber vitni. Hinu vil ég vekja athygli á að mjög óvenjulegt er að ríkissjóður eignist hlut í íþróttahúsi, einkum í ljósi þess að fyrir nokkrum árum var gerð sú breyting á verkaskiptingu ríkis og sveitarfélaga að ríkið dró sig út úr eignarhaldi og kostnaðarþátttöku á íþróttahúsum. Þessi tillaga mun hins vegar væntanlega boða breytingar á þessari stefnu og það er gott til þess að vita fyrir ýmsa staði úti á landi.
