Sjávarútvegsráðherra (Þorsteinn Pálsson):
Herra forseti. Ég minni aðeins á í þessu sambandi að það er ekki svo að sjútvrh. flytji tillögur á Alþingi um fjármögnun einstakra rannsóknarverkefna á vegum Hafrannsóknastofnunar. Hafrannsóknastofnun fær á fjárlögum heildarfjárveitingu og þarf síðan að skipta henni niður á fjölmörg verkefni. Auðvitað þarf oft að hagræða verkefnum, koma inn nýjum verkefnum með því að láta önnur sitja á hakanum eða víkja. Allt fer það eftir því hvernig á stendur í verkefnaáætlunum og vinnu. Í ályktun Alþingis fólst ekki nein krafa um að öðrum verkefnum yrði vikið til hliðar fyrir þetta.
Ég minni svo á að flutningsmenn málsins hafa heldur ekki flutt tillögur um það við afgreiðslu fjárlaga að fjármunir yrðu sérstaklega veittir til þessa verkefnis.