[prenta uppsett í dálka] 70. fundur, 122. lþ.
Guðmundur Hallvarðsson:
Herra forseti. Ég deili áhyggjum mínum með hv. fyrirspyrjanda Svavari Gestssyni varðandi þetta mál. Í bréfi frá Árbæingum segir m.a., með leyfi forseta:
,,Við höfum undanfarna mánuði fundið fyrir vaxandi óróa og öryggisleysi meðal íbúa. Vímuefnaneysla ungmenna, svo og endurtekin atvik þar sem ofbeldi er beitt og spjöll unnin á einka- og almannaeignum eru orðin það áberandi að við svo búið má ekki láta standa.``
Herra forseti. Ég hjó eftir því að í máli hæstv. dómsmrh. að málið væri að hluta til leyst með því að hafa einn lögregluþjón til staðar í Árbæjarhverfi. Ég tel að þarna hafi ekki verið stigið verulega heillavænlegt skref fyrir íbúa í Árbæ. Ég tel nauðsynlegt að þarna verði sett upp stöð, sambærileg þeirri sem er í Breiðholti. Sú stöð var lögð niður fyrir skömmu en síðan tekin í notkun aftur. Lögreglumenn á lögreglustöðinni í Breiðholti unnu mjög gott verk og mörgum kom mjög á óvart að sú stöð skyldi lögð af um tíma. Ég treysti því að Árbæingar fái betri löggæslu og óskir þeirra verði að mestu uppfylltar.
