Kristín Ástgeirsdóttir:
Hæstv. forseti. Með þessari brtt. er undirstrikað að hinn nýi Íbúðalánasjóður á að vera sjálfbær stofnun og að ekki er reiknað með framlögum úr ríkissjóði til hans. Þar með er stigið eitt skrefið í þá átt að afnema félagslega aðstoð í húsnæðiskerfinu. Ekkert liggur fyrir um hvaða áhrif þessi breyting muni hafa á fjármagnsmarkaðinn og verðbréfamarkaðinn og m.a. vakti Vinnuveitendasambandið sérstaka athygli á því að ekkert slíkt mat liggur fyrir. Á þessu verður ríkisstjórnin að bera ábyrgð, herra forseti, og ég greiði ekki atkvæði.