Jón Kristjánsson (andsvar):
Herra forseti. Það er gott að það kom fram að hv. þm. er andvígur því að hafa flugvöllinn á þeim stað sem hann er og vill láta loka honum. Ég er honum ósammála um það. Ég vil undirstrika að ef loka á norður-suður brautinni og þeirri braut þar sem aðflugið liggur yfir Landspítalann, 07/25, sérstaklega norður-suður brautinni, sem er mikið notuð braut, er flugvöllurinn náttúrlega orðinn nær ónothæfur. Málið stendur um það hvort halda á þessum velli opnum eða ekki. Ég er þeirrar skoðunar að það eigi að halda honum opnum.