[prenta uppsett í dálka] 28. fundur
Fyrirspyrjandi (Ísólfur Gylfi Pálmason):
Herra forseti. Afstaða þessa skelegga ráðherra kemur mér mjög á óvart. Ég var að spyrja ráðherrann um afstöðu hans til þessara mála. Hann les upp úr svari Vegagerðarinnar og segir að þeir beri alla ábyrgð á málinu. Ráðherrann ber ábyrgð á Vegagerðinni. Það er alveg ljóst. Það er ráðherrann og ég var að spyrja um afstöðu hans.
Það vantar enn þá öll rök í þessi mál. Það vantar allar tölur. Ég spurði um heildarstefnu. Hvar er framtíðarstefna Vegagerðarinnar í þessum málum? Það er verið að tala um fortíðina. Það er ekki verið að tala um daginn í dag.
Þetta er mjög furðulegt á þeirri forsendu að í Rangárvallasýslu er engin höfn. Allir flutningar fara landleiðina. Það er alveg ljóst. Og það annað sem vekur líka furðu mína. Ég sat á fundi hjá Samtökum sunnlenskra sveitarfélaga ekki alls fyrir löngu þar sem þessi mál bar á góma. Þar sagði flokksbróðir hæstv. ráðherra, hv. 3. þm. Suðurl., að þetta mál yrði tekið til sérstakrar skoðunar og lýsti því þar yfir að þessu máli yrði frestað í það minnsta um fimm ár eða svo. Það kemur hvergi fram í afstöðu ráðherrans og þess vegna spyr ég: Hvaðan hefur þessi hv. þm., flokksbróðir ráðherrans, þær upplýsingar?
