Frsm. meiri hluta sjútvn. (Kristinn H. Gunnarsson) (andsvar):
Herra forseti. Þær veiðiheimildir sem Byggðastofnun er ætlað að hafa til ráðstöfunar ef á þarf að halda er ekki almenn úthlutun í atvinnulífi. Það er viðlagaákvæði til að bregðast við þar sem atvinnulíf hefur hrunið. Það verður bara að skilja milli mín og hv. þm. ef þingmaðurinn er ósammála því að fólkið í þeim byggðarlögum þar sem búið er að selja burtu kvótann eigi einhvern rétt á aðstoð frá hinu opinbera í formi veiðiheimilda. Það eru út af fyrir sig skýr skil á milli pólitískra viðhorfa.
Mig langar að vekja athygli á því að jafnaðarmenn sem allt þetta kjörtímabil hafa talað fyrir veiðleyfagjaldi og sagt: við erum með skýrar tillögur um veiðileyfagjald, að bjóða upp veiðiheimildirnar, --- nefna ekki þessar tillögur í áliti sínu núna. Nú tala þeir um réttlátt úthlutunarkerfi. Ég skil það svo, herra forseti, að þingmenn jafnaðarmanna séu á harðahlaupum undan tillögum sínum um veiðileyfagjald og kjósi helst að minnast ekki á þær þegar rætt er um stjórn fiskveiða.