Árni M. Mathiesen (andsvar):
Herra forseti. Aðeins til þess að glöggva mig betur á skoðunum hv. þm. Össurar Skarphéðinssonar umfram það að honum sé annt um framtíð þjóðarinnar í bráð og í lengd.
Hvað varðar þau þrjú atriði er skipta mestu máli fyrir okkur Íslendinga í Kyoto-bókuninni er staðan sú að samningaviðræðum um hvernig á að fara með skógrækt og sérstaklega landgræðslu er ólokið, samningaviðræðum um hvernig á að fara með viðskipti um mengunarkvóta er ólokið og samningaviðræðum um það hvernig á að fara með íslenska ákvæðið er ólokið. Er það rétt skilið hjá mér að hv. þm. sé sáttur við stöðuna eins og hún er í dag og að við eigum bara að undirrita bókunina og hætta frekari þátttöku í samningum um þessi atriði og sætta okkur við niðurstöðuna eins og hún er í dag?