[prenta uppsett í dálka] 80. fundur, 123. lþ.
Valgerður Sverrisdóttir:
Hæstv. forseti. Ég mæli fyrir frv. til laga um veitingu ríkisborgararéttar sem kemur frá allshn. 1. október sl. tóku gildi breytingar á lögum um ríkisborgararétt og urðu nokkrar breytingar á skilyrðum um veitingu ríkisborgararéttar. Helsta breytingin er fólgin í að dómsmrh. var veitt heimild til að veita þeim íslenskan ríkisborgararétt sem uppfylla lögbundin skilyrði. Eftir sem áður getur Alþingi veitt ríkisborgararétt með lögum, sbr. 6. gr. laga nr.100/1952. Þeim sem ekki uppfylla öll lögbundin skilyrði er gefinn kostur á að senda sérstaka greinargerð til allshn. þar sem fram kemur rökstuðningur fyrir því hvers vegna þeir telja að gera eigi undanþágu í þeirra tilviki. Að þessu sinni bárust 12 slíkar umsóknir til nefndarinnar.
Nefndin leggur til að ein undanþága verði veitt að þessu sinni. Þar er um að ræða barn sem ættleitt var af íslenskri konu og færeyskum manni á fyrri hluta ársins 1998. Barnið uppfyllir ekki skilyrði til að fá ríkisfang kjörföður og við ættleiðinguna uppfyllti það ekki heldur skilyrði til að fá ríkisfang kjörmóður. Hefði barnið verið ættleitt eftir 1. okt. sl. er lögunum um íslenskan ríkisborgararétt var breytt, hefði það hins vegar öðlast íslenskt ríkisfang. Með hliðsjón af þessu leggur nefndin til að barninu verði veittur íslenskur ríkisborgararéttur með lögum.
