Guðrún Helgadóttir:
Hæstv. forseti. Hér er um að ræða rétt eina skerðingu á kjörum sjómanna og það aldraðra sjómanna sem lokið hafa löngu starfi á sjó. Það er verið að lækka greiðslur til sjómanna á þeim forsendum að sjóðurinn hafi ekki efni á að greiða það sem gert hefur verið ráð fyrir. Á sama tíma líður ekki sá dagur að við fáum ekki upplýsingar um ótrúlegan gróða sjávarútvegsfyrirtækja. Hefði ekki verið nær, hæstv. forseti, að leita annarra leiða en fara í vasa sjómannanna sjálfra, öldruðu sjómannanna, til þess að bjarga sjóðnum? Ég tek ekki þátt í atkvæðagreiðslu í þessu máli.