Ásta R. Jóhannesdóttir:
Herra forseti. Ég heyri það að hæstv. dómsmrh. þekkir ekki þetta tilvik en maður þarf ekki endilega að þekkja tilvikið til þess að hafa skoðun á því hvort þetta sé rétt aðferð. Auðvitað er það óþolandi bæði fyrir geðsjúklinginn og aðstandendur hans sem telja hann nánast óhultan, fárveikan á sjúkrahúsi, að uppgötva að hann sé í fangageymslum vegna þess að sjúkrahúsið getur ekki sinnt þeirri þjónustu sem ætti að veita á geðdeildum.