Kolbrún Halldórsdóttir (andsvar):
Herra forseti. Mín athugasemd við ræðu hæstv. umhvrh. lýtur að undanþáguákvæðinu. Ég ítreka, þar sem íslenska ríkisstjórnin sætir nú rannsókn fyrir Evrópudómstólnum, að það er engin undanþáguheimild í tilskipuninni sem heimilar að vikið sé frá kröfunni um mat á umhverfisáhrifum eftir að tilskipunin tók gildi og við höfum lögfest EES-samninginn. Það er alveg ljóst, herra forseti, að framkvæmdir í Evrópu hafa verið dæmdar í mat þó að þær hafi haft gömul leyfi. Þetta á hæstv. umhvrh. að vita og beygja sig undir.
En varðandi það sem hér hefur verið rætt, að skilgreina þurfi hvað er hafin framkvæmd, þá vil ég geta þess hér að í athugasemdum sem nefndinni sem samdi frv. bárust, m.a. frá Rarik, er þess getið og mikil áhersla lögð á að slík skilgreining þurfi að vera í lögunum og ekki sé eðlilegt að það sé geðþóttaákvörðun ráðherra hverju sinni.