Kolbrún Halldórsdóttir (andsvar):
Herra forseti. Hæstv. umhvrh. er afskaplega flinkur í að snúa málunum sér í hag og tönnlast á þessari ótrúlegu setningu, að lög séu ekki afturvirk.
Virðulegi forseti. Allir sem eru í þessum sal vita að lög eru ekki afturvirk. En deilan stendur ekki um það. Deilan stendur um það hvort undanþáguákvæði sem verið hefur í gildandi lögum og á nú að framlengja fram úr hófi til loka árs 2002 samrýmist EES-samningnum. Það er til skoðunar í útlöndum og hjá háum stofnunum. Það leysum við að sjálfsögðu ekki hér, herra forseti.
En að tönnlast á þeirri tuggu að lög séu ekki afturvirk er óþarfi. Það þarf ekki að segja það oftar í þessum ræðustól því að það vita allir hér inni.