[prenta uppsett í dálka] 94. fundur, 125. lþ.
Flm. (Árni Johnsen) (andsvar):
Herra forseti. Ég vil taka undir orð hv. síðasta ræðumanns. Það er mjög mikilvægt að þarna sé samfelldur taktur á milli starfs bæði Vestnorræna ráðsins og stóra bróður, Norðurlandaráðs. Því miður er það svo að þessi þrjú eylönd í norðurkantinum hafa verið svolítið einangruð alveg eins og Ísland hefur að sumu leyti verið svona fylgifiskur í Norðurlandaráði, þó að það starf skipti auðvitað miklu máli. En öflugu þjóðirnar þar stýra hlutunum og þar er skriffinnska mikil. Það er meira unnið á persónulegum nótum í Vestnorræna ráðinu og meiri beintenging við umhverfi, land, þjóð og atvinnulíf o.s.frv. Það hefur skilað okkur áleiðis og ráðherrar okkar hafa fylgt þeim málum vel eftir á undanförnum árum, ræktað þessi samskipti og aukið þau. Þegar við hugsum til lengri tíma erum við um leið að gera tvennt, við erum að verja hagsmuni okkar, auðlindahagsmuni, inn í framtíðina og eðlileg samskipti við næstu granna okkar sem eiga að byggjast á vinarþeli, orði sem er erfitt að þýða á önnur tungumál.
