[prenta uppsett í dálka] 18. fundur, 125. lþ.
Mörður Árnason:
Herra forseti. Hér kom þó fram eitthvað fram sem líktist svari, efnislegu svari við fsp. hv. þm. Tveir sjálfstæðismenn höfðu áður notað tækifærið til þess að hreyta ónotum í Ríkisútvarpið og áhugamenn um þjóðarútvarp á Íslandi.
Málið stendur ekki um stjórn einstakra dagskrárliða. Auðvitað er það í höndum starfsmanna útvarps. Málið stendur um grundvallarreglur um störf blaðamanna, fréttamanna og dagskrárgerðarmanna, að þeir séu ekki seldir á fæti eins og reyndar tíðkast á ýmsum útvarpsstöðvum öðrum en þjóðarútvarpinu. Málið snýst um traust hlustenda, eigenda þjóðarútvarpsins til útvarps síns. RÚV, Ríkisútvarpið, þjóðarútvarpið á að vera fyrirmynd annarra fjölmiðla. Það er frumskylda þess að halda trausti hlustenda þegar kemur að hinu gráa og stundum svarta svæði gagnvart auglýsendum og kostunaraðilum.
