[prenta uppsett í dálka] 26. fundur, 125. lþ.
Ögmundur Jónasson (andsvar):
Herra forseti. Á Alþingi hafa menn atvinnu af því að taka ákvarðanir, segir hv. þm. Hjálmar Jónsson. Þannig háttar á Íslandi að valdinu er þrískipt, löggjafarvald, framkvæmdarvald og dómsvald. Á Alþingi smíða menn lög og má til sanns vegar færa að það feli vissulega í sér að taka ákvarðanir en annar veigamikill þáttur í starfi Alþingis er að veita framkvæmdarvaldinu aðhald.
Nú greinir okkur á um hvort framkvæmdarvaldið fari að lögum í þessu máli. Hv. þm. Hjálmar Jónsson telur svo vera. Ég tel svo ekki vera. Ég vil beina spurningu til hv. þm.: Ef minni hluti á Alþingi, en verulegur hluti þingsins engu að síður, og meiri hluti þjóðarinnar er sammála því að Fljótsdalsvirkjun skuli fara í lögformlegt mat á umhverfisáhrifum á þann hátt sem við höfum óskað eftir, hverja telur hann vera sína skyldu, hverja telur hann vera sína lýðræðislegu skyldu og hvað finnst hv. þm. vera sanngjörn framganga?
