Rannveig Guðmundsdóttir:
Virðulegi forseti. Þetta er auðvitað hárrétt hjá hv. þm. Sverri Hermannssyni. Það er ekkert vit í að taka þetta mál á dagskrá og umræðan í gær leiddi það náttúrlega í ljós. Við förum mjög á skjön við gildandi lög í landinu um umhverfismat. Hið alvarlegasta í málinu kom fram í gær, og þá er ég ekki að tala um málið sem slíkt, er forsrh. sjálfur sagði að hann skildi ekki umhverfismat. Þó gilda um það lög frá Alþingi sem sett hafa verið í stjórnartíð hans. Hæstv. forsrh. sagði að fólkið vildi bara eitthvert umhverfismat og fengi það með þessu móti.
Við mómæltum því í allan gærdag að Alþingi væri falið að framkvæma umhverfismat. Ég tek því undir það með hv. þm. Sverri Hermannssyni að auðvitað var ekki nokkur glóra í að taka þetta mál á dagskrá þótt við létum það yfir okkur ganga og byrjuðum á umræðunni í gær.