Utanríkisráðherra (Halldór Ásgrímsson) (andsvar):
Herra forseti. Ég mótmæli því að ég hafi vitnað ranglega í þessa málsgrein í dómi Hæstaréttar. Þegar Hæstiréttur talar um sambúð, er þá ekki alveg ljóst að Hæstiréttur á í því tilviki við tekjur maka? Af hverju skyldi talað um sambúðina eða hjónabandið? Er það ekki vegna þess að Hæstiréttur er að leggja áherslu á að það sé mikið atriði í þjóðfélaginu, að fjölskyldan sé grundvallareining, að hjónabandið skipti miklu máli? Ég les það út úr orðum Hæstaréttar. Auðvitað hlýtur Hæstiréttur að hafa í huga tekjur fjölskyldunnar, tekjur þeirra sem eru í sambúð.