Guðjón A. Kristjánsson (andsvar):
Herra forseti. Nú skal ég ekki fullyrða að ég hafi skrifað orð hæstv. utanrrh. nákvæmlega orðrétt niður. En svona skrifaði ég það niður sem hann sagði: ,,Er það virkilega svo að það eigi að takmarka vald löggjafans á að greiða einstaklingi bætur án tengingar við tekjur maka?`` Að takmarka vald löggjafans til þess. Og annað: ,,Það þarf að koma í veg fyrir að dómurinn hafi áhrif inn í aðra löggjöf í þessu landi.``
Nú hafa dómar iðulega áhrif og það er bara eðlilegt þegar dómur fellur í Hæstarétti að hann hafi áhrif. Og þegar dómur er byggður á stjórnarskrá og mannréttindasáttmála þá dreg ég mjög í efa að það sé okkar hlutverk að fara að reyna að snúa þar út úr meiningunni eða breyta þeirri túlkun.