Félagsmálaráðherra (Páll Pétursson) (andsvar):
Herra forseti. Það er Flóttamannastofnunin í Genf sem beinir til okkar ákveðnum flóttamannahópum, það er ákvörðun Alþjóðaflóttamannastofnunarinnar hvaðan við tökum við gestum. Við gerum ekki pöntun, hvorki í hvíta né svarta, en Flóttamannastofnunin hefur beint til okkar fólki frá Balkanskaga, þ.e. frá ríkjum fyrrum Júgóslavíu. Þar var mikil neyð, þar er mikið af fólki enn í flóttamannabúðum. Um helmingur þeirra flóttamanna sem hingað hafa komið eru frá Kraína-héraði, var rekinn þaðan af Króötum vegna þess að þetta var fólk í blönduðum hjónaböndum þar sem annar makinn var Serbi, hinn Króati.
Við tókum líka á móti hópi frá Kosovo þegar stríðið stóð þar yfir og það var fólk sem var nýkomið á flótta. Það hefur tekist afar vel hjá okkur að taka á móti þessu fólki og það kann að hafa einhver áhrif á það að Alþjóðaflóttamannastofnunin, sem hefur veitt okkur mikla viðurkenningu fyrir frammistöðuna í þessu verkefni, beinir til okkar þessum hópum.