[prenta uppsett í dálka] 119. fundur, 126. lþ.
Frsm. 2. minni hluta efh.- og viðskn. (Ögmundur Jónasson) (andsvar):
Herra forseti. Hæstv. viðskrh. kveinkaði sér hér undan málefnalegri gagnrýni Vinstri hreyfingarinnar -- græns framboðs og sagði að við yrðum að skilja að Framsfl. væri framsækinn flokkur og frjálslyndur. Nú langar mig til að spyrja hæstv. ráðherra:
Í hverju birtist frjálslyndi Framsfl.? Í að loka pósthúsum á landsbyggðinni og segja þar upp starfsfólki? Að einkavæða elliheimilin í landinu? Að einkavæða barnaskóla í Hafnarfirði?
Birtist frjálslyndi Framsfl. í því að aflétta álögum á hlutabréfagróða?
Birtist frjálslyndi Framsfl. í því að skerða barnabætur?
Birtist frjálslyndi Framsfl. í að ganga erinda stóriðjuhagsmuna á kostnað almennings í landinu?
Birtist frjálslyndi Framsfl. í að brjóta stjórnarskrá á öryrkjum og hafa af þeim réttmætar bætur?
Birtist frjálslyndi Framsfl. í því að lækka skattleysismörk og íþyngja sérstaklega lágtekjufólki á Íslandi?
Birtist frjálslyndi Framsfl. í því að standa gegn öllum tillögum Vinstri hreyfingarinnar -- græns framboðs um endurreisn velferðarkerfisins, standa gegn öllum tillögum Vinstri hreyfingarinnar -- græns framboðs um endurreisn í atvinnumálum, um byggðaþing, sem hæstv. byggðamálaráðherra þáv. lagðist sérstaklega og hart gegn hér í þingsölum? Birtist frjálslyndi Framsfl. á þennan hátt?
Framsfl. er lítill, hræddur flokkur, sem á sér þá hugsjón eina að sýnast framfarasinnaður og frjálslyndur og þóknast íhaldinu í landinu.
