Árni Steinar Jóhannsson (andsvar):
Virðulegi forseti. Ég vil á sama hátt og hv. þm. Guðmundur Árni Stefánsson þakka hv. þm. Guðjóni A. Kristjánssyni fyrir merka og góða yfirferð, ekki síst varðandi lífeyrissjóðsmál sjómanna. Kannski hefði farið betur á því að hv. stjórnarþingmenn sem ætla að styðja þetta frv. hefðu verið í salnum og hlýtt á þennan akademíska fyrirlestur hv. þm. en því miður voru þeir fáir.
Ég og hv. þm. vorum saman á fundi í nótt þar sem farið var yfir þetta frv. til laga og mig langar að spyrja hann um mat hans á afstöðu Sjómannasambandsins varðandi aflýsinguna á verkfallinu. Er það ekki vegna þess að það er kalt mat Sjómannasambandsins að frv. leiði til kjaraskerðingar, gerðardómnum séu gefnar línur í frv. þannig að þeir hafi metið það þannig að betra væri að aflýsa verkfalli í von um að halda málum í því horfi sem þau eru núna í staðinn fyrir að upplifa og standa frammi fyrir kjaraskerðingu með þessu frv.?