Guðmundur Árni Stefánsson (andsvar):
Herra forseti. Við komum alltaf að kjarna málsins. Til þessa voru refirnir skornir. Það á að vísa þessari pólitísku ábyrgð á hendur einhverra annarra.
En ég árétta það og undirstrika og ég heyri að hæstv. ráðherra er mér sammála um það að verið er að leggja til að auka heildarskattbyrði á íbúa í landinu. Og forustumenn ríkisstjórnarinnar og ríkisstjórnin fara fram með þá stefnumörkun. Það er því sem við erum andvíg.
Við samþykkjum það hins vegar, eins og hæstv. ríkisstjórn gerir í raun og sanni og kemst að sömu niðurstöðu og tekjustofnanefndin, að sveitarfélögin hafa þörf yfir þessa fjármuni, það sýna allar tölur, og þess vegna erum við að auka á heimildir þeim til handa. Að segja síðan í öðru orðinu að kannski noti þau þetta ekki er auðvitað aumur flótti frá raunveruleikanum og eins og ég sagði áðan verið að varpa hinni pólitísku ábyrgð á herðar einhverra allt annarra en sjálfs sín. Og það er ekkert mjög stórmannlegt í pólitík, það verð ég að segja, herra forseti.