Ásta R. Jóhannesdóttir:
Herra forseti. Ég þakka hv. þm. Katrínu Fjeldsted fyrir þessa fyrirspurn og ráðherranum fyrir svörin. Þetta er mjög merkileg fyrirspurn og umræða.
Það að kanna náttúruminjar á hafsbotni getur haft mjög mikið aðdráttarafl, t.d. fyrir ferðaþjónustuna. Ég þekki að það hefur verið mjög vinsælt að fara í köfunarleiðangra og skoða ýmislegt á hafsbotni, bæði rústir við Grikkland og sömuleiðis skipsflök víða í Karíbahafinu. Ég þekki það sjálf, en ég fór með stóra hópa þegar ég var á árum áður leiðsögumaður á annan áratug bæði að stóra kóralrifinu í Ástralíu, þar sem við fórum í litlum kafbáti með fjöldann allan af íslenskum ferðamönnum að skoða þetta. Þetta er mjög merkilegt. Við Kenýa, í Indlandshafinu, eru síðan stór svæði friðuð þar sem eru kórallar og sjávarlíf sem er engu líkt og dregur að þúsundir ferðamanna á hverju ári. Ég tel að við gætum lært af því og boðið hér upp á mjög merkilega ferðaþjónustu.