[prenta uppsett í dálka] 97. fundur, 127. lþ.
Gísli S. Einarsson:
Virðulegur forseti. Ég vil þakka þessa umræðu og þakka fyrir þessa fyrirspurn. Ástæða er til að ræða þessi mál. Menn sáu nefnilega á fjölmörgum stöðum á landsbyggðinni mjög mörg tækifæri í atvinnu- og byggðamálum í kjölfar orða stjórnmálamanna. Hæstv. forsrh. Davíð Oddsson sagði m.a. á Alþingi 23. febrúar 2000 um flutning tiltekinna verkefna til Ólafsfjarðar:
,,Ég tel að þessi vinna sem einkum hinir fjórir ráðuneytisstjórar hafa komið að sé í góðum farvegi. Þó að ég vilji ekki tímasetja á þessu augnabliki nákvæmlega hvenær starfsemin geti hafist, þá er vinnan komin vel af stað og ákvörðun af því tagi hefur því verið tekin.``
Mér finnst að þessi orð segi meira en margt annað um hvernig staðan er. Sagt var að þessir hlutir væru að gerast. En það hefur ekkert gerst.
