Þuríður Backman:
Herra forseti. Hér liggur fyrir frávísunartillaga sem ég styð. Það á ekki að virkja nema orkukaupandi sé til staðar, en hann verður í allra fyrsta lagi til staðar í lok ársins 2003 vegna þeirrar stöðu sem málið er í og hvarfs Norsk Hydro frá málinu.
Úrskurður umhvrh. hefur auk þess verið kærður og hefur nú verið tekinn til dómsmeðferðar. Ég tel rétt að fá niðurstöður í það mál áður en við afgreiðum á þingi lagafrv. sem byggir á þeim úrskurði sem er nú í kæruferli.
Varðandi arðsemi verkefnisins þá er ekki allt reiknað til kostnaðar sem með eðlilegum hætti á að vera inni í þessu dæmi. Ég tel að hin mikla þjóðhagslega arðsemi sem hér er reidd fram sem rök í málinu standist ekki þegar litið er til fleiri þátta.