Frsm. félmn. (Arnbjörg Sveinsdóttir) (andsvar):
Hæstv. forseti. Ég vil einkum víkja að tveimur atriðum sem koma fram í brtt. hv. þm. Steingrími J. Sigfússonar, þ.e. spurningunni um hvort þarna eigi að standa óbundið atvinnuleyfi eða ótímabundið atvinnuleyfi.
Ástæða þess að þetta orðalag er notað áfram í lagatextanum er að þetta er hugtak sem notað hefur verið fram að þessu varðandi þessi leyfi og ekki er talin ástæða til þess að breyta heitinu á leyfinu.
Varðandi 8. gr. leggur hann til að orðalagi verði breytt eða ég lít svo á að þarna sé nánast um orðalagsbreytingar að ræða, því þó að í textanum standi ,,ríkar sanngirnisástæður`` þá er, eins og fram kemur í athugasemdum við þessa grein, auðvitað gert ráð fyrir því að tekið sé tillit til þeirra ástæðna sem hann tekur fram í sínum texta, þ.e. að þarna verði um sanngirnisástæður og mannúðarsjónarmið að ræða. Í upplegginu í frv. er hreinlega gert ráð fyrir þessu sem fram kemur í brtt. hans.