Einar Oddur Kristjánsson (andsvar):
Herra forseti. Frá upphafi hef ég litið á það og lít á það enn sem eðlilegan hlut að útgerðin í landinu sé handhafi þeirra veiðirétta sem er úthlutað hverju sinni. Sameignin, þ.e. skylda ríkisins til þess að hámarka veiðina og fara sem best með hana, er ríkisins. En útgerðin í landinu er handhafi þessa réttar. Þannig að hvort sem við köllum það eignarrétt eða eignarréttarígildi, það liggur fyrir í mörgum dómum, þá tel ég eðlilegt að útgerðin í landinu sé handhafi réttarins.
Ég lít á fyrningarleiðina sem þjóðnýtingarleið. Ég geri það. Það er alveg skýrt í mínum huga. Ég tel það langsamlega farsælast þessu þjóðfélagi að útgerðarmenn landsins, smáir sem stórir, séu handhafar réttarins.