Ögmundur Jónasson (andsvar):
Herra forseti. Að sjálfsögðu viljum við stuðla að heilbrigðu atvinnulífi. Við viljum jafnframt stuðla að réttlátri og raunsærri skattlagningu.
Ég vek athygli á því að með þessum skattkerfisbreytingum er verið að færa hátekjuskattshlutfallið úr 275 þús. í 331 þús. kr. á mánuði árið 2002, á sama tíma og öryrki með 80 þús. kr. á mánuði er skattlagður um 70 þús. kr., eða sem nemur nánast heilum mánaðartekjum hans. Þetta finnst mér vera ranglátt. Ég fæ ekki skilið hvernig þetta getur stuðlað að velmegun á Íslandi.