Einar Már Sigurðarson:
Herra forseti. Hér er hreyft mikilvægu máli. Það er rétt sem kom fram í máli hv. fyrirspyrjanda, það hefur legið fyrir um nokkurt skeið að mun hærra hlutfall nemenda á landsbyggðinni hefur áhuga á því að fara í iðnnám en á höfuðborgarsvæðinu. Það er auðvitað að hluta til tengt því hvernig samsetningin er í atvinnulífinu á stöðunum.
Ég held að það mikilvægasta í að endurbæta og breyta starfsnámi hér á landi sé að tryggja enn betri tengsl atvinnulífs og skóla. Ég held að hæstv. menntmrh. gæti beitt sér af krafti í að gera ýmsar tilraunir frekar á landsbyggðinni en á höfuðborgarsvæðinu vegna þess að hver svo sem skýringin á því er virðist vera meiri fjarlægð, því er verr og miður, á höfuðborgarsvæðinu á milli skóla og atvinnulífs en víðast er á landsbyggðinni. Þess vegna væri að mínu mati afar þarft að gerð yrði tilraun til að treysta þessi tengsl einhvers staðar á landsbyggðinni þar sem verknámsskóli er til staðar.