Lúðvík Bergvinsson (andsvar):
Virðulegi forseti. Ég hef bara eina mínútu til að svara þessu en ég held að rétt sé að upplýsa hæstv. ráðherra um að við tökum yfir u.þ.b. 80--90% af regluverki Evrópusambandsins miðað við þá samninga sem við erum með í dag þannig að það mundi ekki aukast mikið.
Ég þori einnig að fullyrða að þeim í Brussel er nákvæmlega sama um það hvort útgáfa leyfa er hjá Vegagerðinni eða hjá aðalskrifstofu samgrn., alveg nákvæmlega sama. Það eru engar áætlanir um að flytja þessi verkefni frá A til B.
Hins vegar, virðulegi forseti, kemur það fram að hér er um viðbótarskattlagningu að ræða vegna leyfisveitinga og menn eiga ekki að vera að rugla inn í það einhverjum öryggiskröfum í flótta sínum frá málinu heldur koma fram og útskýra hvernig á því standi að auknar tekjur, minni verkefni, leiði ekki til þess að hægt sé að draga saman á fjárlögum. Þetta þarf hæstv. ráðherra að útskýra og hætta að röfla endalaust um öryggiskröfur sem koma þessu máli ekkert við.