Ögmundur Jónasson:
Herra forseti. Það er vísað í álitsgerðir lögfræðinga. Ég skil mjög vel að menn vilji hafa leynd yfir starfslokasamningum fyrrverandi forstjóra Símans. Ég skil hins vegar ekki að það skuli vera viðskiptaleyndarmál. Í álitsgerðum lögfræðinganna er vísað í hagsmuni fyrirtækisins. En hvað um eigendurna? Verða hagsmunir fyrirtækis og eigenda, sem er íslenska þjóðin, greindir í sundur?
Herra forseti. Hætt er við því að í skjóli leyndar þrífist spilling og ég spyr um handhafa hlutabréfs þjóðarinnar í þessari stofnun, hæstv. samgrh. Hvers vegna í ósköpunum hefur hann ekki beitt sér fyrir því að opnað verði á þessar upplýsingar því að sjálfsögðu verður ekki hætt fyrr en þær liggja hér á borðum?