Sigríður Jóhannesdóttir:
Hæstv. forseti. Ég tek undir mikilvægi þess verkefnis sem verið er að vinna á Keldum þar sem reynt er að vinna að bóluefni gegn hrossaexemi sem hefur valdið gríðarlegum skaða í útflutningi á íslenskum hrossum. Ef tekst að finna bóluefni væri náttúrlega komin varanleg lausn á þessu vandamáli.
En ég verð að segja að komist hefur á kreik orðrómur um eða mér hefur alla vega verið sagt að hægt væri að gera næmipróf á hrossum þannig að hægt væri að finna út hvaða hross væru sérstaklega næm fyrir þessum sjúkdómi og að einn íslenskur dýralæknir, í samstarfi við þennan prófessor Leibold gæti komið á slíku næmiprófi. Mér finnst mjög mikilvægt að leita þá samstarfs líka við þessa aðila og nota þetta næmipróf þangað til fullnægjandi lausn er fundin.