Gísli S. Einarsson:
Virðulegur forseti. Hér er á ferðinni tillaga um að bæta almenna löggæslu í landinu. Til fjárln. komu fulltrúar fjölmargra sveitarfélaga sem kvörtuðu mjög yfir skorti á almennri löggæslu í sveitarfélögunum. Áberandi umræða hefur verið um vöntun á almennri löggæslu í Reykjavík. Við vekjum athygli á þessu alvarlega máli því að almenn löggæsla hefur dregist saman um sem nemur 30% á undanförnum árum. Dregið hefur verið úr framlögum um 30%. Þess vegna bendum við á þessa tillögu og vísum sérstaklega til þeirrar beiðni sem liggur fyrir frá sveitarfélögunum.