[prenta uppsett í dálka] 55. fundur, 128. lþ.
Guðjón A. Kristjánsson:
Herra forseti. Það er aðallega tvennt sem mig langar að víkja að og ætla ég að reyna að fá það mál afgreitt með því að beina spurningum til hæstv. iðnrh. Í 6. gr. frv. segir, með leyfi forseta:
,,Stjórn Norðurorku hf. setur gjaldskrár um verð á seldri orku og vatni til notenda. Gjaldskrár fyrir sölu á rafmagni og heitu vatni öðlast eigi gildi fyrr en þær hafa verið staðfestar af iðnaðarráðherra og birtar í Stjórnartíðindum. Gætt skal almennra arðsemissjónarmiða við setningu gjaldskrár.``
Spurningin er: Telur hæstv. ráðherra að þessi formbreyting eins og hún hefur nefnt þetta frv., þ.e. að það væri aðeins formbreyting, muni leiða til kostnaðarauka fyrir íbúa á þjónustusvæði Norðurorku hf. með tilliti til efnis 6. gr. sem getur ekki um hagsmuni neytendanna?
Í öðru lagi spyr ég í tilefni af orðum hæstv. iðnrh. í tvígang í kvöld um sameiningarferli Orkubús Vestfjarða og Rariks. Hún hefur sagt í tvígang að því verði frestað um sinn eins og málin hafi nú skipast. Ég vil spyrja hæstv. iðnrh.: Er það stefna hæstv. ráðherra að sameina fyrirtækin þó nú sé frestur á illu bestur? Er það stefnan sem hún ætlar að vinna að í framtíðinni?
