Össur Skarphéðinsson (andsvar):
Herra forseti. Hér fyrr í dag rifjaði hæstv. ráðherra upp að innan Framsfl. hefði verið starfandi sérstök Evrópustefnunefnd. Niðurstaða hennar í stærstum dráttum fólst í því að íhuga ætti þrjá kosti:
1. Þann möguleika sem fælist í tvíhliða samningi Íslands og Evrópusambandsins.
2. Að uppfæra samninginn um Evrópska efnahagssvæðið.
3. Að búa þannig um hnúta varðandi hag Íslands í framtíðinni að sækja um aðild að Evrópusambandinu.
Hæstv. utanrrh. hefur fyrir löngu slegið út af borðinu þann kost sem felst í tvíhliða samningi landsins við ESB.
Nú kom fram í ræðu hæstv. utanrrh. að hann telji ákaflega daufar vonir standa til þess að hægt verði að ná einhverri endurskoðun á EES-samningnum sem skiptir máli fyrir hag Íslands í framtíðinni. Því spyr ég hæstv. utanrrh.: Má draga þá ályktun af orðum hans og niðurstöðu Evrópustefnunefndar að skoðun Framsfl. í dag sé sú að best sé fyrir framtíð Íslands að leita eftir því að landið gangi í Evrópusambandið?