Pétur H. Blöndal (andsvar):
Herra forseti. Hv. þm. Jóhanna Sigurðardóttir sagði margt og mikið um skerðingu á hámarkinu. Ég hélt að hún væri eiginlega á móti skerðingunni þegar leið á ræðuna en svo allt í einu sagði hún að það væri eðlilegt að taka til skoðunar að setja hámark. Nú vil ég spyrja hv. þm.: Vill hv. þm. hafa hámark á greiðslunum eða ekki?
Rætt hefur verið um fjárhagsvandræði sjóðsins og talaði hv. þm. um að bæta orlofi ofan á sem yrði um 10--11%, bæta sem sagt 500 millj. kr. við hallann. Er það rétt í stöðunni eins og hún er núna?