[prenta uppsett í dálka] 95. fundur, 130. lþ.
Gunnar Örlygsson (andsvar):
Hæstv. forseti. Stefna Breta er vissulega áhugaverð þegar talað er um fartölvusendiherra og þar fram eftir götunum. En lítil þjóð sem Íslendingar ætti með ráð og dáð, eins og ég kom inn á í ræðu minni áðan, að kanna rækilega alla sparnaðarmöguleika í utanríkisþjónustu sinni. Það er ekkert launungarmál að kostnaður til utanríkismála á Íslandi hefur tvöfaldast ef ekki þrefaldast á nokkrum árum. Því er eðlilegt að hér á löggjafarsamkundu þjóðarinnar sé tekið eftir þessu og það borið upp við utanrrh.
Mér er spurn, hæstv. forseti, hvort utanrrh. hyggist kanna hvort möguleikar séu til sparnaðar í utanríkisþjónustunni.
